व्यास संगीत विद्यालय, दादर येथे शनिवार दिनांक २६/०७/२०२५ रोजी संध्याकाळी ‘श्रावण स्वरधारा’ हा संगीताचा कार्यक्रम आयोजित करण्यात आला. अपेक्षेप्रमाणेच कार्यक्रम अतिशय सुश्राव्य आणि देखणा झाला. दरवर्षी श्रावण महिन्यात हा कार्यक्रम संपन्न होतो. या कार्यक्रमात पावसाच्या गाण्यांसोबतच श्रावण महिन्यात येणाऱ्या विविध सणांवर आधारित गाणी म्हणायची अशी संकल्पना मांडून, विद्यार्थ्यांना गाणी निवडण्यासाठी तसे आवाहन करण्यात आले. या वैशिष्ट्यपूर्ण कल्पनेला विद्यार्थ्यांकडून नेहमीप्रमाणेच खूप सकारात्मक प्रतिसाद मिळाला. पावसासोबतच कृष्णावरची गाणी, दहीहंडी, नागपंचमी, रक्षाबंधन इत्यादी सणांवर आधारित काही परिचित काही अपरिचित अशी विविधरंगी मराठी – हिंदी गाणी विद्यार्थ्यांनी मोठ्या तयारीने आणि आत्मविश्वासाने सादर केली. प्रत्यक्ष कार्यक्रमात गाण्यांसोबत वाद्यांची साथसंगत करण्यासाठी आपल्याच विद्यालयातले विद्यार्थी आलटूनपालटून बसत होते.

कु. मोहन चिपकर या विद्यार्थ्याचा संगीत विशारद पूर्ण (तबला) ही परीक्षा प्रथम श्रेणीत उत्तीर्ण झाल्याबद्दल यथोचित सत्कार करण्यात आला. या सांगितिक मैफिलीतले काही महत्वाचे क्षण, छायाचित्रकार श्री कमलेश दादरकर यांनी त्यांच्या कॅमेऱ्यात टिपले. कार्यक्रमासाठीचा फलक लावणे, स्टेजची मांडामांड, साऊंड सिस्टीम लावणे, निवेदन आणि कार्यक्रम संपल्यानंतर सगळी आवराआवर करून जागा पूर्ववत करणे या कामांसाठीचा आपल्या विद्यार्थ्यांचा उत्साह वाखाणण्याजोगा होता. कार्यक्रमाचे नेटके नियोजन आणि सादरीकरण तसेच विद्यार्थांना या कार्यक्रमात सहभागी होण्यासाठी प्रोत्साहित करण्याचे महत्त्वाचे काम समस्त शिक्षकवृंदाने मोठ्या आनंदाने केले.

उत्तरोत्तर रंगत गेलेल्या अनेक उत्तम सादरीकरणांनी कार्यक्रमाचा कळसाध्याय गाठल्यानंतर, या सांगितिक मैफिलीची सांगता सौ. स्वराली मॅडम यांच्या ‘भरलं आभाळ’ या रंगतदार आणि सुश्राव्य लावणीने झाली. ज्येष्ठ शिक्षक श्री कुलकर्णी सर यांनी आपल्या छोटेखानी व प्रोत्साहनपर निवेदनात आजी माजी विद्यार्थ्यांचे कौतुक केले, तसेच विद्यार्थ्यांच्या सांगितिक कलागुणांना आणखी वाव मिळावा यासाठी असे कार्यक्रम नेहमी आयोजित केले जावेत अशी सदिच्छा व्यक्त केली.

एकंदरीतच श्रावण स्वरधारा हा कार्यक्रम श्रवणीय आणि प्रेयस होता. विद्यार्थ्यांमधल्या कलागुणांना वाव देण्यासाठी त्यांच्याच सहभागातून असे वैविध्यपूर्ण उपक्रम व्यास संगीत विद्यालयात नेहमीच राबवले जातात. त्याला विद्यार्थ्यांचा कायमच अभूतपूर्व प्रतिसाद मिळतो, त्यामुळे असे कार्यक्रम सदैव यशस्वी होतात. २६ तारखेला पार पडलेल्या या कार्यक्रमात विद्यार्थी तसेच कानसेन श्रोत्यांची शेवटपर्यंत उत्स्फूर्तपणे टिकलेली हजेरी, प्रत्येक गाण्यानंतर होणारा टाळ्यांचा कडकडाट आणि मिळणारी वाहवा हीच ‘श्रावण स्वरधारा’ या कार्यक्रमाच्या झळझळीत यशाची पोचपावती होती असे म्हणायला हरकत नाही.

शब्दांकन : गिरीश घैसास